गुबै फारानि सोंनायनि फिननाय:
1. सोंथि: सिदनि एण्डेलआ सोर? बियो बबेयाव माब्ला जोनोम मोनदोंमोन आरो आसामआव माब्ला सोरजों फैफादोंमोन? बियो बबेयाव माब्ला रुंसारि जादोंमोन?
फिन: रेभारण्ड सिदनि एण्डेलआ इंलेण्डनि सासे ख्रिष्टान मिसनारिमोन। बिथाङा इंलेण्डनि तटेनेज मुंनि थावनियाव इं 1840 मायथायाव जोनोम मोनदोंमोन आरो इं 1864 मायथायाव आसामनि तेजपुराव बर' ख्रिष्टानफोरननि धोरोम गुरु हेजेलमियार (Hesselmyr) नि लेङाय जानानै फैदोंमोन। बिथाङा आसामनि तेजपुरावनो इं 1907 मायथायाव रुंसारि जादोंमोन।
2. सोंथि: सिदनि एण्डेलखौ बर'फोरा मानो 'गामिनि ब्राइ' होनना गाबज्रियोमोन? बियो बबे बर' ओनसोलाव थानो लादोंमोन? बियो बर' गामि गामि मानो आरो मा थांखियै थाबायदिङोमोन?
फिन: रेभारण्ड सिदनि एण्डेलखौ बर'फोरा बर'फोरनि सुखु दुखुनि बुब्लियाव गसंफानायनि थाखाय अननानै 'गामिनि ब्राइ' होनना गाबज्रियोमोन। बिथाङा आसामनि तेजपुर जिलानि बर' ओनसोलाव थानो लादोंमोन।
रेभारण्ड सिदनि एण्डेलआ बर' गामि गामि थाबायदिङोमोन। मानोना गोग्लैसोनानै थानाय बर' रावखौ बर'नि गामि गेजेर गेजेर थाबायदिंना बर'फोरनि हाबा-हुखा, दामनाय-देनाय, मोसानाय-मुसुरनाय, रंजानाय-बाजानाय जेरावबो नुजाहैनानै बिसोरनि गोसो खंखराव उप्लेहाबना एबा गुलि गुलि खालामनानै बर' हान्जामा एबा बर' माहारिनि आसार खान्थिफोरखौ बुरन बुसि सोलोंनो नाजायोमोन आरो बर'फोरनि सुखु दुखुनि बुब्लियाव गावबो गसंफायोमोन। बेनि अनगायैबो सोरनिबा नख'राव मानसि थैयोब्ला गुरब्ला नुजाहैयोमोन आरो दुखु दाहानि बिबान लाफानायजों लोगोसे बर'फोरनि गोथै बोगारनाय बाउगारनाय आसारफोरखौ एण्डेलआ बुथुमनानै लायोमोन, बबेबा गामियाव सल' खिन्थानो गोरों बर' ब्राइ दंब्ला एण्डेलआ सल' लिरथुउमनो गुरब्ला नुजाहैयोमोन, बबेबा गामियाव समायना रमायना गोमो-गोथां बाथ' गां गाबनि आगर गोनां बर' सि (जि) दंब्ला फट' सेबखांनो बेयावबो एण्डेलआ सहैयोमोन, बबेबा गामियाव मेथाइ खनननो गोरों मानसिफोर दंब्ला बर' खुगा मेथाइफोरखौ लिइरखांनो हामफ्ला-सिमफ्ला एण्डेलआ नुजाहैयोमोन। बेफोरखौ बुरन बुसि लांनानै बै समनि "The Asiatic Society of Bengal"आ दिहुननाय Research Paper फोराव बर'फोरनि सोमोन्दै गोलाव गोलाव रायथाइ लिरना मुलुगनि जिंगालु पण्डितफोरनि सिगांआव बर' नख्रांखौ बुरब्लाना होदोंमोन बिथां एण्डेलआनो। बे थांंखियैनो एण्डेलआ बर' गामि गामि थाबायदिङोमोन।
